Día 2: iniciando o proxecto

 Bo día!

 Que produtivo foi o día de hoxe!! 😋

Mentres que a primeira reunión para decidir o tema tivo que ser por Teams, hoxe tivemos a sorte de poder reunirnos presencialmente (respectando as medidas, por suposto), o que fixo que a comunicación e a toma de decisións fose moito máis fluída.

Deste xeito, comezamos facendo unha chuvia de ideas sobre cales podían ser os mellores recursos didácticos para traballar o tema proposto; para isto, recollemos recursos traballados na propia materia de Escola, Comunidade e TIC, así como outros programas e plataformas empregadas nos distintos niveis educativos que cursamos. Finalmente, decantámonos por dous recursos que semellan ser idóneos para fomentar a aprendizaxe significativa e o traballo cooperativo: estamos a falar dunha WebQuest (a cal, á súa vez, incluirá unha presentación interactiva) e un Scape Room como actividade final. Veremos que nos depara a creación deste material!!

Unha vez elixido isto, tamén comezamos a revisar libros de texto de 3º de Educación Primaria de diversas editoriais, para así poder adaptarnos ao nivel do curso e contrastar diversas fontes de información.

Seguiremos informando, deixamos unha foto nosa do comezo desta mañá tan frutífera :) 

Fonte: elaboración propia.