Día 4: continuamos elaborando material didáctico

Hoxe tivemos a mañá libre e aproveitámola para avanzar no noso proxecto. Despois de decidir que actividades iamos incorporar na WebQuest, decidimos poñernos en marcha na súa elaboración. 

Como xa indicamos en posts anteriores, pensamos que podía ser boa idea elaborar unha presentación interactiva para que sexan os propios discentes os que vaian adquirindo os contidos do tema ao seu propio ritmo. Para a elaboración desta, non tiñamos moi claro que programa empregar (Power Point, Prezi ou Genially). Finalmente, decantámonos por Genially; non obstante, ningunha de nós o empregara con anterioridade, polo que ao principio resultounos algo complexo e tivemos que recurrir a vídeos explicativos para comezar o traballo.

Cando xa tiñamos claro como manexar o programa (a verdade é que non era tan difícil como pensabamos) puxémonos mans á obra e conseguimos rematar a presentación. Levounos bastantes horas sobre todo polo feito de que non podemos editar á vez, así como polo uso de imaxes Creative Commons, xa que para a nosa temática as posibilidades ofrecidas eran limitadas. 

Con todo, vendo o resultado, quedamos moi contentas co resultado e isto motivounos moito para seguir traballando!💪

Aquí vola deixamos... Seguiremos informándovos! 😊